Stellingwarfs, 08-01-2008 (P-PvhN) Stellingwarfs, 08-01-2008 (P-PvhN) In et zuudoosten van de perveensie Frieslaand liggen de Stellingwarven. Ik kan me veurstellen dat niet elkenien in Delfziel, Rodeschool of Erica dat wet dus daoromme even disse uutleg. Et aorige is dat d’r daor deur een pat van de meensken een tael praot wodt die as dudelik ofwiekt van et Fries. Starker nog, et ligt vule dichter tegen et Drents an as tegen et Fries. Wi’j bin daor dan ok van et Saksische slag. Dat komt omdawwe vroeger bi’j Drenthe heurden en omdat de rivier de Tjonger een enorme (tael)barrière west is. We heuren now al weer 500 jaor bi’j Frieslaand en dat het oons spietig genog niet al te vule opleverd. Weren we doe et paantien onder et koppien Frieslaand en mossen we genoegen nemen mit de flutters die d’r over henne spatten as d’r volop inschonken wodde, ok now nog wo’n we nog steeds niet veur vol ankeken. Bi’j et Frysk Festival is d’r gien Stellingwarfs te heuren en bi’j Omrop Fryslân mis ie een struktureel pergramme in et Stellingwarfs, wiels wi’j wel mitbetaelen meugen an disse Friestalige zender. Gelokkig hebben wi’j de Stichting Stellingwarver Schrieversronte die heur al 35 jaor inzet veur et Stellingwarfs en al meer as 130 boeken uutgeven het. Mar ok zi’j hebben et ti’j niet kearen kund. Et Stellingwarfs wodt niet meer praot op de schoelepleinen en dan bi’j op weg naor et ende. Ik moete eerlik zeggen da ’k de moed wat opgeven hebbe en mar besluten hebbe om een Nederlaanstaelige cd op te nemen: “Rozen in de winter”. Mar jim kun gerust wezen, as Stellingwarver keunstemaeker blieve ik vanzels ok wel in et Stellingwarfs deurproesen. Jim kun mi’j op google zo vienen.
Karst Berkenbosch
Boarne: Partij voor het Noorden, Nieuwsbrief 56, 8 jan. 2008, s. 8