‘Frysk’ blinders,

Bovenstaonde kop klinkt misschien wat gek veur een Stellingwarver, mar toch mien ik et wel. Et is toch van de zotte dat d’r Friezen in et Friese Friesland wonen die heur verzetten tegen de ‘Fryske plaknammen’. Warkelik de meest idiote argementen wo’n daorbi’j anvoerd. Et zol schaedelik wezebn veur et toerisme volgebns VVV en veur de klaanten van ondernemers zol et verwarrend wezen en dan kun ze misschien de ondernemer niet meer vienen.

Wat een mierkers en wat een dikke flauwekul. Ik hebbe de proef op de som neumen: Bi’jkaans alle bedrieven mit een eigen webstee uut IJlst vien ie ok wel mit de toevoeging Drylts. En veur TomTom maekt et niks uut aj’ naor IJlst gaon en in Drylts te lane kommen. Hi’j zet je daor gewoon veur de deure of. En et argement dat de ekenomische krisis hierdeur veur de bedrieven alliend nog mar verargerd wodt, is zo veer zocht, dat ik haost et idee kriege dat ze daor wat passenielsleden kwiet willen onder et mom van: et is de schuld van de gemeente.

Nee, ik daenke dat de Friese plaknaemen alliend mar bi’jdregen zullen an et eigen kerakter van Friesland. Ik vun et temeensen prachtig dat ze in Wales niet in et Engels mar in et Welsh op de bodden staon en ik hebbe niet et idee da’k daordeur en cent minder uutgeven hebbe.

Ja, ok veur de Stellingwarven zol et niet verkeerd wezen. Elsloo is mit Else metien van et perbleem of dat et de hieltied verward wordt mit Elsloo uut Limburg. En Noordwolde, dat ok in Grunningen ligt, zol gewoon mit een extra o uut de braand wezen. En van mi’j mag et zo Berkoop wodden. Ik gelove d’r niks van da’k daor ien optreden minder deur kriege.

Kortomme, ik hope warkelik dat ze in Wymbritseradiel de kop d’r veur holen, dan bin ik d’r van overtuugd dat d’r over een peer jaor gieniene meer vremd opkikt van naemen as Drylts, Heech, Skearnegoutum en Wâldsein om mar een peer te numen. As Hollaanse toerist kriej’ zo toch een heerlik butenlaans gevuul in et binnenland. Wat wil een meens nog meer. Kotomme, de kop d’r veur en de plaknaemen in et ‘Frysk’ blinders.

KARST BERKENBOSCH

Boarne: Leeuwarder Courant, 17-12-2008, s.

<< Werom nei 'Poadium 2008'